Ndërkohë që raportohet se bisedimet e drejtpërdrejta mes SHBA-së dhe Iranit po zhvillohen në Islamabad me ndërmjetësimin e Pakistanit, situata në Lindjen e Mesme mbetet e tensionuar.
Izraeli ka bërë të ditur se ka vijuar operacionet ushtarake në territorin libanez, duke deklaruar se ka goditur mbi 200 objektiva të lidhura me Hezbollahun gjatë 24 orëve të fundit. Sipas Forcave Mbrojtëse të Izraelit (IDF), sulmet ajrore po vazhdojnë dhe po mbështesin edhe njësitë tokësore që veprojnë në jug të Libanit. Po ashtu, theksohet se janë shënjestruar lëshues raketash me qëllim parandalimin e sulmeve ndaj territorit izraelit.
Nga ana tjetër, Ministria e Shëndetësisë e Libanit raporton se si pasojë e sulmeve në jug të vendit kanë humbur jetën gjashtë persona, ndërsa pesë të tjerë janë plagosur.
Në të njëjtën kohë, autoritetet izraelite kanë paralajmëruar për një ndërhyrje ajrore në rajonin e Galilesë së Epërme në veri të vendit, ndërsa ende nuk është konfirmuar se kush qëndron pas incidentit apo sulmit të raportuar në atë zonë.
