Pas shpalljes së epidemisë në Gostivar dhe rrethinë, Qeveria ka njoftuar se do të sigurojë 50.000 litra ujë të pijshëm në ditë për qytetarët, derisa të zgjasin masat dhe rekomandimet e institucioneve shëndetësore.
Sipas njoftimit, shpërndarja e ujit do të bëhet përmes Shërbimit për Punë të Përgjithshme dhe të Përbashkëta të Qeverisë, në disa pika të caktuara në Gostivar, përfshirë ndërtesën e ujësjellësit, Shkollën e Mesme Ekonomike, Pyjet e Maqedonisë, ESM-në, parkingun e Spitalit të Përgjithshëm “Ferid Murat” dhe Njësinë Territoriale të Zjarrfikësve.
Qeveria thekson se institucionet kompetente po vazhdojnë kontrollet dhe analizat për të zbuluar shkakun e epidemisë, ndërsa ka paralajmëruar se përgjegjësi do të ketë për këdo që konstatohet se ka shkelur ligjin.
Po ashtu, bëhet e ditur se do të ndërmerren të gjitha masat e nevojshme për të mbështetur qytetarët deri në normalizimin e plotë të situatës.
