Një histori që dëshmon rëndësinë e reagimit të shpejtë dhe profesionalizmit të stafit mjekësor ka ndodhur së fundmi në Kosovë, ku një 52-vjeçar arriti t’i mbijetojë një infarkti masiv dhe disa arresteve kardiake.
Pacienti fillimisht u paraqit në Urgjencën Primare të QKMF-së në Viti me dhimbje të forta në gjoks. Pas ekzaminimit me EKG, mjekët konstatuan një infarkt masiv dhe nisën menjëherë trajtimin e nevojshëm, duke vendosur transferimin urgjent drejt Spitalit Rajonal të Gjilanit.
Megjithatë, sapo mbërriti në spital, gjendja e tij u përkeqësua dhe ai pësoi arrest kardiak. Ekipi mjekësor reagoi pa humbur kohë, duke nisur menjëherë procedurat e reanimimit.
Sipas njoftimit, pacienti pësoi episode të përsëritura të fibrilacionit, duke bërë që mjekët të kryenin rreth 16 defibrilime deri sa arritën ta stabilizonin dhe ta rikthenin në ritëm normal të zemrës.
Pas stabilizimit, 52-vjeçari u transferua në QKUK, ku iu nënshtrua koronarografisë. Mjekët vendosën një stent për shkak të bllokimit të arteries së majtë të zemrës, ndërsa ai po vazhdon trajtimin në Klinikën e Kardiologjisë me gjendje stabile.
Ky rast është vlerësuar si një shembull i bashkëpunimit dhe përkushtimit të stafit mjekësor në të gjitha nivelet e sistemit shëndetësor, duke dëshmuar se reagimi i shpejtë dhe puna ekipore mund të shpëtojnë jetë.
