Këngëtari i njohur dhe ish-finalisti i “Big Brother VIP Albania”, Miri, ka folur së fundmi për eksperiencën e tij në reality show dhe për mënyrën si është perceptuar nga publiku gjatë qëndrimit në shtëpi.
Në një intervistë për “Revistën Bordo”, artisti i njohur edhe si pjesë e grupit “West Side Family” u shpreh se pjesëmarrja në Big Brother ka qenë një përvojë e veçantë, e cila e ka vendosur përballë vetes dhe publikut në mënyrë të drejtpërdrejtë.
Ai veçoi dy momente si më të rëndësishmet e rrugëtimit të tij: surprizën e takimit me vajzën dhe momentin e ribashkimit me familjen në finale, të cilat i cilësoi si emocione të paharrueshme.
Miri theksoi se, megjithëse eksperienca ka qenë e bukur, ajo ka pasur edhe sfida të shumta emocionale gjatë gjithë rrugëtimit në spektakël. Sipas tij, mbështetja më e madhe ka ardhur nga bashkëshortja e tij, e cila ka qenë pranë tij si gjatë lojës ashtu edhe pas përfundimit të saj.
Duke folur për komentet dhe paragjykimet që ka marrë gjatë kohës në shtëpi, ai u shpreh se shpesh është ndjerë i keqkuptuar nga publiku.
“Më ka prekur kur jam gjykuar për gjëra që nuk i kam bërë. Kur perceptimi bëhet më i fortë se e vërteta, kjo të lëndon”, tha ai.
Ai shtoi se një pjesë e madhe e perceptimeve publike nuk pasqyrojnë realitetin e plotë të lojës, por krijohen nga fragmente të shkurtra të transmetuara në ekran.
Në përfundim, Miri e përshkroi eksperiencën në Big Brother si një mësim të rëndësishëm jetësor, duke theksuar se ka fituar më shumë respekt për publikun dhe ka mësuar të largojë konfliktet që, sipas tij, i përkasin vetëm lojës televizive.
