Maqedonia e Veriut po përgatitet të bëhet një nga vendet e para në rajon që do të zbatojë plotësisht modelin për heqjen e tarifave shtesë të roamingut me Bashkimi Evropian.
Ministri për transformim digjital, Stefan Andonovski, deklaroi se qytetarët në të ardhmen do të mund të flasin, të dërgojnë mesazhe dhe të përdorin internet në vendet e BE-së me të njëjtat çmime si në vendin e tyre.
Sipas tij, qëllimi është që modeli tashmë funksional i roamingut në Ballkan të zgjerohet edhe në territorin evropian.
Procesi ndodhet në fazë të avancuar, pasi institucionet kanë përfunduar obligimet fillestare dhe tashmë e kanë dërguar tekstin e harmonizuar në BE për mendim zyrtar. Pas miratimit nga Brukseli, ndryshimet ligjore pritet të dërgohen për votim në Kuvend.
Andonovski theksoi se, edhe pse nga Komisioni Evropian kanë ardhur pyetje shtesë, procesi po vazhdon intensivisht dhe nuk është ndalur.
Ai foli edhe për procesin eurointegrues, duke theksuar se Qeveria mbetet e përkushtuar ndaj integrimit evropian, por çdo hap i ardhshëm duhet të mbrojë interesat kombëtare dhe të shoqërohet me garanci të qarta nga BE-ja.
