Tetë vajza shqiptare, të cilat kanë qenë shoqe dhe pjesë e së njëjtës klasë në Bernë të Zvicrës, kanë përfunduar me sukses një etapë të rëndësishme të arsimimit dhe përgatitjes së tyre profesionale.
Bleona M., Seade D., Ilire G., Sabina G., Diellza Z., Gentijana B., Emenda K. dhe Nora T. kanë përmbyllur studimet e tyre në Zvicër, duke nisur rrugëtimin drejt profesioneve të ndryshme.
Mes tyre ka të diplomuara në mjekësi, higjienë dentare, burime njerëzore (HR) dhe fusha të tjera të arsimit të lartë.
Ajo që i bashkon nuk është vetëm suksesi akademik, por edhe një miqësi që ka nisur që në vitet e shkollimit. Ato kanë ndarë të njëjtën klasë, janë rritur së bashku dhe kanë ruajtur lidhjen me prejardhjen e tyre shqiptare.
Ky sukses përbën një moment të veçantë edhe për familjet e tyre, të cilat i kanë mbështetur gjatë gjithë rrugëtimit të tyre arsimor dhe profesional.
Historia e tetë vajzave është një shembull i gjeneratës së re shqiptare në Zvicër, që po ndërton të ardhmen përmes arsimit, punës dhe profesionalizmit, duke ruajtur njëkohësisht lidhjet me origjinën e tyre.
