Këngëtari i njohur Sinan Vllasaliu ka folur për herë të parë rreth aksidentit me motor që pësoi ditë më parë, nga i cili mbeti i lënduar dhe iu desh t’i nënshtrohej një ndërhyrjeje kirurgjikale.
Në një intervistë për “Prive”, ai tregoi se aksidenti ndodhi papritur, në një moment kur kushtet e rrugës ishin të pafavorshme për shkak të reshjeve të shiut.
“Gjithçka ndodhi shumë shpejt. Rruga ishte e lagur dhe në një kthesë humba kontrollin e motorit. Nuk po ecja me shpejtësi të madhe, por me motor çdo gabim mund të ketë pasoja”, u shpreh ai.
Këngëtari theksoi se ndihma e menjëhershme që mori pas aksidentit ishte vendimtare. Sipas tij, një mik i afërt, i cili është anesteziolog, ka reaguar menjëherë dhe ka ndihmuar në trajtimin e tij të shpejtë.
“Jam me fat që pranë meje ishte një person profesionist. Gjërat mund të kishin marrë një rrjedhë tjetër nëse nuk do të reagohej në kohë”, tha Vllasaliu.
Për shkak të gjendjes shëndetësore, ai nuk mundi të marrë pjesë në dasmën e artistes me famë botërore Dua Lipa, megjithëse pjesëmarrja e tij ishte planifikuar prej kohësh.
“Ishte një organizim i bërë muaj më parë dhe më erdhi keq që nuk munda të isha i pranishëm. Megjithatë, më e rëndësishmja është që jam mirë dhe po rikuperohem”, deklaroi ai.
Në fund, Sinan Vllasaliu falënderoi të gjithë miqtë, kolegët dhe fansat për mbështetjen dhe mesazhet e shumta që ka marrë gjatë kësaj periudhe, duke shtuar se së shpejti shpreson t’i rikthehet angazhimeve të tij artistike.
