Loredana Brati ka qenë së fundmi e ftuar në “Top Albania Radio”, ku ka folur hapur për jetën e saj personale dhe zhvillimet pas daljes nga shtëpia e Big Brother VIP Albania.
Ajo ka sqaruar për herë të parë arsyet që çuan në përfundimin e marrëdhënies së saj me Jozin, duke treguar se periudha pas BBVA ka qenë e tensionuar për të dy dhe ka ndikuar në ftohjen e raportit mes tyre.
Sipas saj, një nga momentet që e rëndoi situatën ishte edhe incidenti i bujshëm gjatë daljes nga programi, i cili krijoi presion dhe emocione të forta për të dy palët. Loredana tha se edhe pse Jozi kishte qenë i pranishëm në ditëlindjen e saj pas BBVA, marrëdhënia mes tyre nuk ishte më e njëjtë.
Ajo konfirmoi se historia e tyre është mbyllur përfundimisht, duke theksuar se ndarja ka ardhur si rezultat i gabimeve nga të dyja palët dhe mungesës së vazhdimësisë në raport.
“Me Jozin nuk ka më kthim mbrapa,” u shpreh ajo, duke e konsideruar këtë kapitull të mbyllur.
Në intervistë, Loredana ka folur edhe për zërat që e lidhnin me Gjestin dhe qëndrimin e tyre në të njëjtën vilë. Ajo i ka mohuar këto aludime, duke sqaruar se bëhej fjalë vetëm për rastësi vendndodhjeje dhe se nuk ka pasur asnjë takim apo flirt mes tyre.
Loredana theksoi se provat dhe komunikimet tregojnë qartë se ajo dhe Gjesti kanë qenë në ambiente të ndara dhe me persona të ndryshëm, duke hedhur poshtë çdo spekulim që ka qarkulluar në rrjet.
Ajo shtoi se ka tentuar ta sqarojë situatën privatisht edhe me Xhenetën, por kjo e fundit nuk ka pranuar të dëgjojë versionin e saj.
Në fund, Loredana u shpreh se për Gjestin ruan respekt dhe i uron suksese në vazhdim të karrierës së tij.
