Pas vendimit të Gjykatës Speciale në Hagë ndaj ish-krerëve të UÇK-së, filantropi Lazim Destani ka reaguar publikisht, duke shprehur zhgënjimin e tij dhe duke bërë thirrje për unitet politik e shoqëror në Kosovë.
Destani ka thënë se vendimi i sotëm është pritur me ndjenja të vështira dhe ka theksuar rëndësinë që, sipas tij, UÇK-ja ka në historinë e Kosovës dhe në rrugën drejt lirisë.
Më poshtë gjeni reagimin dhe thirrjen e tij të plotë:
Sot jam thellësisht i zhgënjyer nga vendimi i Gjykatës Speciale në Hagë ndaj krerëve të UÇK-së.
Është e vështirë të përshkruhet me fjalë ndjenja që kemi në një ditë si kjo. Emri i UÇK-së është i lidhur me një periudhë vendimtare të historisë së Kosovës, me luftën për liri, me sakrificën dhe me shpresën që një ditë fëmijët tanë të rriteshin të lirë në vendin e tyre.
Besojmë dhe shpresojmë se në procesin e apelit çdo fakt, argument dhe rrethanë do të shqyrtohet me drejtësi dhe përgjegjësi të plotë.
Sot dua të bëj një apel që shkon përtej çdo partie dhe çdo dallimi politik.
Kosova sot ka nevojë për bashkim.
U bëj thirrje të gjitha forcave politike që, të paktën në momente të këtilla, t’i lënë mënjanë përplasjet dhe interesat partiake dhe të gjejnë gjuhën e përbashkët për çështjet që prekin vendin.
Dhe kur është në pyetje Kosova, duhet të dimë të qëndrojmë bashkë.
