Reperi i njohur shqiptar, Rigels Rajku (Noizy), ka dëshmuar në seancën e sotme gjyqësore, ku ka treguar detaje mbi konfliktin e tij me Kleviol Ahmeti dhe një ngjarje të rëndë që, sipas tij, ka ndodhur në banesën e tij në Durrës.
Noizy tha se në katin e parë të pallatit ku jetonte është vendosur një sasi eksplozivi (tritol), i cili ka shpërthyer gjatë orëve të natës. Ai deklaroi se ka qenë në gjumë në momentin e ngjarjes dhe është zgjuar rreth orës 09:00, ndërsa shpërthimi dyshohet të ketë ndodhur mes orës 03:00 dhe 04:00.
Sipas tij, shpërthimi ka shkaktuar dëme të konsiderueshme në hyrjen e pallatit, në xhamat e një lokali dhe dyqani që ai zotëron, si dhe ka krijuar një gropë në tokë. Në të njëjtin pallat jetonin edhe prindërit e tij, në një kat më lart.
Ai e lidh ngjarjen me një konflikt të mëhershëm me Kleviol Ahmetin, duke pretenduar se mes tyre ka pasur përplasje verbale dhe fizike një ditë para shpërthimit. Po ashtu, Noizy ka deklaruar se pas incidentit i është djegur edhe një automjet.
Reperi shtoi se nuk ka pasur bashkëpunim me Kleviolin më parë, por e përshkroi atë si një person që e ka provokuar vazhdimisht në rrjetet sociale dhe platforma si TikTok.
