Një zjarr ka shpërthyer në një ndërtesë banimi në lagjen Kisella Vodë të Shkupit, duke shkaktuar panik te banorët dhe evakuim urgjent të objektit.
Sipas informacioneve të para, flakët dyshohet se kanë përfshirë instalimin elektrik të ndërtesës, ndërsa tymi i dendur u përhap shpejt nëpër korridore dhe hapësirat e përbashkëta.
Banorët janë detyruar të largohen menjëherë nga banesat e tyre, ndërsa dëshmitarët tregojnë se shumë prej tyre dolën jashtë në panik, disa madje të veshur vetëm me pizhame. Mes të evakuuarve kishte edhe familje me fëmijë të vegjël dhe foshnja.
Në vendngjarje kanë intervenuar ekipet zjarrfikëse, të cilat arritën ta vënë zjarrin nën kontroll dhe të parandalojnë përhapjen e flakëve në apartamentet e tjera të ndërtesës.
Sipas të dhënave të deritanishme, nuk raportohet për persona të lënduar rëndë, ndërsa autoritetet kanë nisur hetimet për zbardhjen e shkaqeve të zjarrit dhe vlerësimin e dëmeve materiale.
Banorët kanë deklaruar se u zgjuan nga tymi dhe alarmi i fqinjëve, duke u larguar me nxitim nga ndërtesa për t’i shpëtuar rrezikut.
