Varfëria në Gjermani arrin nivel rekord, mbi 13 milionë qytetarë në rrezik

Numri i qytetarëve që jetojnë në rrezik varfërie në Gjermani ka arritur nivelin më të lartë të viteve të fundit. Sipas një raporti të publikuar nga një shoqatë gjermane për mirëqenie sociale, rreth 13.3 milionë persona aktualisht jetojnë në kushte varfërie nëse merret për bazë niveli i të ardhurave.

Raporti tregon se shkalla e varfërisë është rritur në 16.1 për qind gjatë vitit 2025, duke shënuar një nga nivelet më të larta të regjistruara deri më tani.

Sipas kriterit të përdorur, në rrezik varfërie konsiderohen personat që kanë të ardhura më të ulëta se 60 për qind e mesatares kombëtare. Për një person të vetëm ky prag është 1.446 euro neto në muaj, ndërsa për një familje me dy të rritur dhe dy fëmijë arrin në 3.036 euro.

Raporti evidenton dallime të mëdha mes rajoneve të vendit. Normat më të ulëta të varfërisë janë regjistruar në Bavari dhe Baden-Württemberg, ndërsa më të lartat në Bremen, Saksoni-Anhalt, Hamburg dhe Berlin.

Veçanërisht shqetësuese konsiderohet situata e të moshuarve, ku pothuajse një në pesë persona mbi moshën 65-vjeçare ndodhet në rrezik varfërie.

Ndër grupet më të prekura përfshihen personat që jetojnë vetëm, familjet me një prind të vetëm dhe qytetarët me nivel të ulët arsimimi. Raporti thekson gjithashtu se një pjesë e konsiderueshme e të prekurve janë të papunë.

Sipas të dhënave, rreth 6.9 për qind e popullsisë në Gjermani nuk ka të ardhura të mjaftueshme për të mbuluar shpenzimet bazë të jetesës, përfshirë edhe kostot e ngrohjes.