Toshkovski: Rasti “Mazut” nuk është i mbyllur

Ministri i Punëve të Brendshme, Pançe Toshkovski, ka deklaruar se nuk e konsideron të përfunduar rastin “Mazut”, duke theksuar se provat që lidhen me këtë lëndë janë tepër serioze dhe nuk duhet të injorohen.

Gjatë një interviste në emisionin “Top Tema”, Toshkovski u shpreh se nuk mund të pranojë që një rast me, siç tha ai, prova të rënda dhe shqetësuese të mbyllet pa u trajtuar në mënyrën e duhur nga institucionet kompetente.

Sipas ministrit, Ministria e Punëve të Brendshme ka kryer detyrat e saj në kuadër të hetimeve, ndërsa përgjegjësia për procedurat e mëtejshme i takon Prokurorisë Publike. Ai vlerësoi se besimi i qytetarëve në sistemin e drejtësisë mund të rikthehet vetëm përmes vendimeve të bazuara në drejtësi dhe përgjegjësi institucionale.

Toshkovski theksoi se nuk ka ndërmend të përplaset me asnjë prokuror individualisht, por shtoi se faktet dhe provat duhet të jenë elementi kryesor mbi të cilin merren vendimet.

Ai deklaroi gjithashtu se është informuar nga hetues të përfshirë në rast, të cilët sipas tij kanë shprehur habi për mënyrën se si është trajtuar lënda, pavarësisht materialeve dhe analizave të dorëzuara gjatë procedurës.

Duke folur për të ashtuquajturën “aferë spiunazhi” në kabinetin presidencial, Toshkovski tha se analiza e provave është ende në proces dhe se Prokuroria duhet të vendosë mbi hapat e mëtejshëm. Sipas tij, informacionet që disponon aktualisht nuk mbështesin pretendimet për një aferë spiunazhi në përmasat që janë paraqitur publikisht.

Ministri ngriti gjithashtu pikëpyetje mbi kohën dhe mënyrën e trajtimit të dy rasteve, duke krahasuar mbylljen e hetimit për “Mazutin” me hapjen e debatit publik rreth çështjes së spiunazhit.

Në fund, Toshkovski vlerësoi se MPB-ja ka bashkëpunim të mirë me një numër prokurorësh dhe prokurorish në vend, duke përmendur se rezultatet e përbashkëta në luftën kundër krimit janë të dukshme në shumë raste të trajtuara gjatë viteve të fundit.