27-vjeçarja humb jetën gjatë një operacioni estetik për zmadhimin e vitheve

Një 27-vjeçare ka humbur jetën gjatë një ndërhyrjeje estetike të njohur si “Brazilian Butt Lift” (BBL), procedurë që përdoret për zmadhimin e vitheve përmes transferimit të yndyrës nga pjesë të tjera të trupit.

Barbara Laura Souza Feliz ishte paraqitur në një klinikë private për t’iu nënshtruar operacionit, i cili përfshinte heqjen e yndyrës nga barku dhe shpina dhe injektimin e saj në zonën e vitheve.

Sipas informacioneve të publikuara nga mediat braziliane, gjatë fazës së transferimit të yndyrës, gjendja e saj shëndetësore është përkeqësuar papritur, pasi ka shfaqur probleme të rënda me frymëmarrjen. Pak më vonë, zemra e saj ka pushuar së rrahuri.

Ekipi mjekësor ka ndërmarrë përpjekje intensive për ta rikthyer në jetë për më shumë se një orë, por pa sukses. Në fund, 27-vjeçarja është shpallur e vdekur në klinikë.

Mjekët dyshojnë se shkaku i vdekjes mund të ketë qenë një emboli pulmonare, e cila mund të jetë shkaktuar nga depërtimi i yndyrës në qarkullimin e gjakut gjatë procedurës kirurgjikale.

Pas ngjarjes, në klinikë kanë mbërritur edhe autoritetet policore, të cilat kanë nisur hetimet për të sqaruar rrethanat e plota të rastit. Trupi i viktimës është dërguar për autopsi në Institutin Mjeko-Ligjor për përcaktimin e saktë të shkakut të vdekjes.

Barbara Laura Souza Feliz ishte nga Belo Horizonte i Brazilit. Ajo punonte si shitëse, ishte beqare dhe nuk kishte fëmijë. Sipas raportimeve, nuk vuante nga probleme të njohura shëndetësore. E reja ishte rritur nga gjyshja e saj dhe kishte një vëlla, ndërsa babai i kishte ndërruar jetë dhe nëna jeton në Spanjë.