Drenusha Latifi ka reaguar lidhur me videot intime që kanë qarkulluar së fundmi në rrjetet sociale, duke dënuar shpërndarjen e materialeve private pa pëlqimin e personave të përfshirë.
Latifi ka theksuar se marrëdhëniet seksuale janë pjesë e jetës dhe nuk duhet të shihen si diçka për të cilën njerëzit duhet të turpërohen, ndërsa shqetësuese, sipas saj, është ekspozimi i jetës intime të të tjerëve pa pëlqimin e tyre.
“Seksi është pjesë e jetës. Të gjithë e bëjmë dhe nuk është turp”, ka shkruar ajo, transmeton “Bota sot”.
Ajo ka vënë theksin te përgjegjësia e publikut për të mos kërkuar dhe shpërndarë materiale të tilla.
“Ajo që është shqetësuese është ekspozimi dhe shpërndarja e videove intime të njerëzve pa pëlqimin e tyre. Nuk ka rëndësi nëse janë gra apo burra — askush nuk meriton të poshtërohet apo të bëhet ‘material’ për publikun”, ka deklaruar Latifi.
Sipas saj, shqetësim paraqet edhe mënyra se si në disa raste krijohet paraprakisht kureshtja e publikut për materiale intime, duke nxitur më pas kërkimin dhe shpërndarjen e tyre.
“Dhe akoma më shqetësuese është kur dikush i paralajmëron këto video paraprakisht, duke nxitur kureshtjen dhe shpërndarjen e tyre”, ka shkruar ajo.
Në fund, Latifi ka bërë thirrje që videot intime të mos kërkohen dhe të mos shpërndahen, duke kërkuar respektimin e privatësisë së personave të përfshirë.
“Mos i kërkoni. Mos i shpërndani. Respektoni privatësinë.
Seksi nuk është turp. Shkelja e intimitetit të dikujt është”, ka përfunduar ajo.
Burimi: botasot.info
