Zhduku 1 miliard dollarë nga bankat, ish-oligarku dënohet me 19 vjet burg në Moldavi

Ish-oligarku moldav Vlad Plahotniuc është dënuar me 19 vjet burg për përfshirje në skandalin financiar të njohur si “vjedhja e shekullit”, ku nga sistemi bankar i Moldavisë u zhdukën rreth 1 miliard dollarë.

Gjykata e shpalli fajtor për rolin e tij në mashtrimin financiar të viteve 2014–2015, një skemë që në atë kohë përbënte rreth 12% të Prodhimit të Brendshëm Bruto të vendit.

Sipas akuzës, Plahotniuc ka përfituar personalisht mbi 40 milionë dollarë dhe është urdhëruar të paguajë edhe rreth 60 milionë dollarë dëmshpërblim ndaj shtetit.

Ai nuk ishte i pranishëm në sallën e gjyqit dhe ka mohuar akuzat, ndërsa avokati i tij ka bërë të ditur se vendimi do të apelohet, duke e cilësuar procesin të motivuar politikisht.

Hetimet tregojnë se ai ka përdorur ndikimin e tij politik dhe ekonomik për të ndërtuar një rrjet mashtrimi financiar, përmes të cilit fondet janë kanalizuar në kompani offshore dhe janë përdorur për shpenzime luksi dhe investime.

Skandali shpërtheu në vitin 2014, kur rreth 1 miliard dollarë u transferuan brenda pak ditësh drejt kompanive jashtë vendit, duke detyruar shtetin moldav të ndërhynte për të shpëtuar sistemin bankar dhe duke shkaktuar një krizë të madhe financiare.

Plahotniuc, dikur një nga figurat më të fuqishme politike dhe ekonomike në Moldavi, u largua nga vendi pas rrëzimit të partisë së tij në vitin 2019. Ai u arrestua në Athinë në vitin 2025 dhe më pas u ekstradua në Moldavi./lajmifundit.al/