Turistët që u bënë milionerë teksa po ecnin në mal pritet të marrin shpërblimin më të madh në histori

Në një mal në veri të Çekisë, dy turistë që zbuluan një thesar prej ari të pastër me peshë 5.230 gramë, do të marrin një shpërblim rekord prej rreth 470 mijë euro nga shteti, shkruan albtime.info

Shuma e shpërblimit për thesarin e madh të gjetur në rrëzë të malit Zvicina në veri të Çekisë është bërë publike. Për thesarin e zbuluar nga dy turistë në shkurt të vitit 2025, zbuluesve do t’u paguhen rreth 470 mijë euro.

GJETËN NJË KOLEKSION TË PËRBËRË NGA AR I PASTËR

Ekspertët e Muzeut të Bohemisë Lindore në Hradec Kralove konfirmuan se thesari përbëhet nga objekte ari të pastër që i përkasin shekujve XIX dhe XX. Koleksioni, me peshë totale 5.230 gramë, përfshin:

• 598 monedha ari
• Më shumë se 30 kuti duhani prej ari
• Bizhuteri të ndryshme dhe sende personale

SI U LLOGARIT SHPËRBLIMI?

U theksua se, për shkak se objektet janë drejtpërdrejt prej ari, vlerësimi ligjor është bërë mbi 100% të vlerës së tyre. Shpërblimi është llogaritur duke u bazuar në çmimin e arit në ditën e zbulimit, që ishte 2.237,5 krona për gram. Vendimi për pagesën, i miratuar nga autoritetet rajonale, është dërguar për miratim përfundimtar në këshillin lokal.

MË I MADHI NË EVROPËN QENDRORE

Drejtori i Muzeut të Bohemisë Lindore, Petr Grulich, theksoi se zbulimi është unik dhe se gjatë karrierës së tij nuk ka hasur në një gjetje të tillë. Autoritetet deklaruan se ky koleksion është një nga thesaret më të mëdha jo vetëm në Çeki, por në gjithë Evropën Qendrore.

MISTERI VAZHDON

Studimet shkencore tregojnë se thesari është fshehur brenda një muri guri pas vitit 1921, por ende nuk dihet kush ishte pronari i tij i vërtetë apo pse u fsheh aty.