Soni Malaj rrëfen betejën e rëndë shëndetësore në fëmijëri

Soni Malaj ka ndarë në emisionin “Ferma VIP” një rrëfim të ndjerë nga fëmijëria e saj, duke treguar një periudhë të vështirë shëndetësore që e ka prekur në moshë shumë të vogël.

Ajo tha se rreth moshës 7–8 vjeçare është përballur me një formë të rëndë reumatizmi, e cila i ka shkaktuar vështirësi serioze në ecje dhe dhimbje të forta.

Soni kujtoi se në atë periudhë ka qenë e shtruar disa herë në spital dhe ka kaluar një proces të gjatë trajtimi mjekësor, i cili i solli përmirësim të pjesshëm.

Megjithatë, ajo tregoi se një situatë gjatë një udhëtimi familjar në Valbonë, ku i është sugjeruar të fuste këmbët në ujë të ftohtë, i ka përkeqësuar sërish gjendjen përkohësisht.

Këngëtarja u shpreh gjithashtu me emocione për sakrificat e familjes së saj, duke theksuar se prindërit e mbanin në krahë për ta dërguar në shkollë dhe për të mos e lënë të izoluar nga bashkëmoshatarët.