Përplasje mes BDI-së dhe VLEN-it për himnin në Kongresin unifikues të VLEN-it

Një debat politik është hapur mes BDI dhe VLEN pas Kongresit të parë unifikues të VLEN-it, për shkak të mosintonimit të himnit kombëtar gjatë aktivitetit, transmeton zhurnal.mk.

Nënkryetari i BDI-së, Bujar Osmani, reagoi përmes një postimi në Facebook, duke kritikuar VLEN-in dhe duke e lidhur këtë çështje me, siç tha ai, heshtjen ndaj proceseve të tjera politike që prekin shqiptarët në Maqedonia e Veriut.

“E ndaluan gjuhën. E ndërpren përfaqësimin e drejtë. E nënçmuan vullnetin e popullit. E bllokuan Evropën. Tani heshtën edhe himnin”, ka shkruar Osmani.

Pas reagimit të Osmanit, kundërpërgjigje ka ardhur nga deputetja e VLEN-it, Saranda Imeri Stafai, e cila akuzoi BDI-në për “standarde të dyfishta” dhe “amnezi kolektive”.

Përmes një postimi në rrjetet sociale, Imeri Stafai publikoi edhe një referencë nga një kongres i mëhershëm i BDI-së, duke pretenduar se edhe aty nuk ishte intonuar himni.

“Histeria që po shfaq BDI është për t’u brengosur. Amnezi kolektive apo standarde të dyfishta…? Ja kështu filloi Kongresi i IV i BDI-së, pa asnjë nishan të himnit. Ama atyre nuk u llogaritet?!!”, ka shkruar deputetja e VLEN-it.

Në fund të reagimit të saj, ajo theksoi se dita ishte festive për VLEN-in, pas bashkimit të koalicionit në një subjekt të vetëm politik.

“Mos na e prishni ditën — ne kemi festë. VLEN u bë NJË”, ka shtuar Imeri Stafai.

Kongresi i mbajtur më 9 maj shënoi transformimin e VLEN-it nga koalicion në një strukturë të vetme politike, ndërsa zhvillimet e fundit kanë nxitur përplasje të reja politike mes pushtetit dhe opozitës shqiptare në vend.//Zhurnal.mk