Paralajmërim për çmimin e bukës: çdo furrë vendos vetë, thotë Malishiq

Buka po shtrenjtohet në disa qytete të vendit. Në disa furra në Shtip, Koçan, Prilep dhe Manastir pritet që çmimi i disa llojeve të bukës të rritet nga nesër, ndërsa në disa vende kjo rritje ka ndodhur tashmë. Sipas informacioneve, buka e bardhë prej 450 gramësh do të shtrenjtohet nga 3 deri në 5 denarë në disa furra.

Ky informacion ka arritur edhe te Grupacioni i industrisë së mullirit dhe bukëpjekjes pranë Dhomës së Tregtisë, por ata theksojnë se çdo furrë vendos në mënyrë individuale për çmimet.

“Ne kemi të dhëna se disa furra, qofshin anëtare apo jo, tashmë kanë rritur çmimet. Për shembull, në Manastir një furrë ka bërë rritje, ndërsa disa furra të vogla në Shtip nuk kanë vendosur ta bëjnë këtë. Kjo krizë po ndikon drejtpërdrejt në kostot e prodhimit të bukës dhe produkteve të tjera të furrës, dhe nëse vazhdon, rritja e çmimeve është e pashmangshme. Çdo furrë do të vendosë vetë, sipas vlerësimit të saj,” tha Goran Malishiq, përfaqësues i industrisë së mullirit dhe bukëpjekjes.

Sipas tij, konflikti në Lindjen e Mesme ka ndikuar në rritjen e kostove për lëndët e para, prodhimin dhe shpërndarjen.

“Gjithçka varet nga rezervat që kanë dhe nga çmimet e furnizimeve të reja. Rritja mund të arrijë rreth 10% ose më shumë. Kjo ndikon në tre segmentet kryesore: furnizimin, pjekjen dhe shpërndarjen. Megjithatë, është e vështirë të përcaktohet saktë rritja, pasi varet nga kompanitë,” shtoi ai.

Rritja e çmimeve të bukës vjen pas shtrenjtimit të vajit, vezëve, si dhe frutave dhe perimeve. Ekspertët paralajmërojnë se rritja e çmimeve të karburanteve mund të nxisë më tej inflacionin dhe të sjellë rritje edhe në produkte të tjera, duke kërkuar nga Qeveria masa urgjente për mbrojtjen e standardit të qytetarëve. Nga ana tjetër, Qeveria thekson se po e ndjek situatën dhe, nëse është e nevojshme, do të ndërmarrë masa të reja.