Mickoski: “Evropa është e ardhmja jonë, por jo me çmimin e identitetit”

Hristijan Mickoski, gjatë ceremonisë për shënimin e 9 Majit – Ditës së Fitores mbi Fashizmin dhe Ditës së Evropës, deklaroi se populli maqedonas, së bashku me shqiptarët, turqit, romët, serbët, vllehët dhe boshnjakët, kanë qenë në anën e duhur të historisë gjatë Luftës së Dytë Botërore.

“Ata nuk luftuan vetëm kundër pushtuesit. Ata luftuan për të drejtën e njeriut për të jetuar lirisht, për të folur gjuhën e tij, për të mbajtur emrin e tij dhe për të besuar në të ardhmen”, tha Mickoski.

Ai theksoi se liria nuk është dhuratë, por rezultat i sakrificës dhe përgjegjësisë, duke shtuar se nuk do të lejojë relativizimin e së vërtetës historike për luftën antifashiste.

“Paraardhësit tanë ishin në anën e duhur të historisë. Dhe unë, si njeri me mandat, nuk do të hesht kur bëhet fjalë për të vërtetën për luftën tonë”, deklaroi ai.

Duke folur për integrimin evropian, Mickoski tha se anëtarësimi në Bashkimin Evropian mbetet qëllimi strategjik i vendit.

“Evropa është rruga jonë e vetme. Atdheu ynë nuk ka të ardhme dhe shans tjetër për sukses përveç integrimit në Bashkimin Evropian”, u shpreh kryeministri.

Ai shtoi gjithashtu se nuk do të bëjë kompromis me identitetin dhe dinjitetin e shtetit.

“Nuk do të bëj kurrë pazar me identitetin dhe dinjitetin tonë në këmbim të ndonjë përfitimi personal ose politik”, tha Mickoski.

Në ceremoni morën pjesë delegacione shtetërore, përfaqësues politikë dhe ambasada të huaja, të cilët vendosën lule pranë monumentit “Çlirimtarët e Shkupit”.