Fillon ndërtimi i interkonektorit mes Maqedonisë dhe Shqipërisë

Vendosja e gurthemelit për linjën interkonektive 400 kV ndërmjet Maqedonisë së Veriut dhe Shqipërisë shënon rifillimin e një projekti me rëndësi të madhe strategjike për stabilitetin energjetik dhe integrimin rajonal. Ky projekt është pjesë e Korridorit 8 panevropian dhe synon lidhjen direkte të sistemeve elektroenergjetike të dy vendeve, rritjen e sigurisë së furnizimit dhe forcimin e shkëmbimit ndërkufitar të energjisë.

Kështu u shpreh drejtori i përgjithshëm i MEPSO-s, Burim Latifi, me rastin e nisjes së ndërtimit të linjës nga nënstacioni TS Manastir 2 deri në pikën kufitare në Qafë Thanë.

“Ky interkoneksion nuk është vetëm infrastrukturë teknike, por një urë besimi mes dy vendeve. Ai dëshmon se bashkëpunimi në energjetikë është i domosdoshëm dhe me përfitime për gjithë rajonin,” tha Latifi, duke theksuar se sistemet dhe resurset e dy vendeve mund të plotësojnë njëra-tjetrën.

Ai kujtoi gjithashtu se projekti për vite me radhë ka qenë i bllokuar, ndërsa tani është rikthyer në fazën e ndërtimit pas eliminimit të pengesave administrative.

Nga ana tjetër, kryeministri Hristijan Mickoski deklaroi se linja Manastir–Elbasan do të mbyllë një boshllëk të rëndësishëm energjetik.

“Për herë të parë do të jemi plotësisht të lidhur me sistemet elektroenergjetike të vendeve fqinje, çka do të thotë më shumë siguri për qytetarët dhe stabilitet për ekonominë,” u shpreh ai.

Ministrja e energjetikës, Sanja Bozhinovska, theksoi se ky projekt përbën bazë për zhvillimin afatgjatë të sektorit energjetik dhe për ndërtimin e kapaciteteve të reja në të ardhmen.

Ndërkohë, ministri i energjetikës së Shqipërisë, Enea Karakaçi, e cilësoi projektin si një investim në sigurinë e përbashkët dhe integrimin evropian, ndërsa përfaqësues të Bashkimi Evropian theksuan rëndësinë e tij për forcimin e rrjeteve energjetike dhe zhvillimin e burimeve të qëndrueshme.

Ky projekt konsiderohet si një hap i rëndësishëm drejt krijimit të një ure të re energjetike mes rajonit dhe Evropës, me përfitime të mëdha ekonomike dhe zhvillimore.