Dasma e Dua Lipës shkakton reagime në Palermo

Dasma luksoze e Dua Lipa dhe Callum Turner në Palermo ka ngjallur reagime të shumta mes banorëve vendas, për shkak të masave të shtuara të sigurisë dhe kufizimeve në disa zona të qytetit.

Ceremonia tre-ditore po zhvillohet në disa prej lokacioneve më të njohura historike të Palermos, përfshirë Piazza Croce dei Vesperi dhe Palazzo Gangi, ku kanë nisur të mbërrijnë qindra të ftuar nga bota e artit dhe showbiz-it.

Megjithatë, organizimi i eventit ka shkaktuar pakënaqësi te një pjesë e banorëve, të cilët kanë vendosur pankarta proteste me mesazhe si: “Palermo nuk jepet me qira” dhe “Sheshi ynë nuk është dhoma juaj e ndenjes”.

Sipas raportimeve, disa biznese lokale janë detyruar të mbyllen më herët, ndërsa banorëve pranë zonave të festimeve u është kërkuar të mbajnë të mbyllura dritaret dhe ballkonet që kanë pamje nga aktivitetet.

Për mbarëvajtjen e ceremonisë janë angazhuar masa të shumta sigurie, përfshirë ndalimin e fluturimit të dronëve dhe dhjetëra truproja private.

Pavarësisht kritikave, autoritetet lokale kanë mbrojtur organizimin e dasmës, duke vlerësuar se eventi sjell promovim ndërkombëtar dhe përfitime ekonomike për qytetin.

Dasma e çiftit vlerësohet të kushtojë rreth 1.5 milion euro dhe pritet të jetë një nga ngjarjet më të komentuara të vitit në botën e showbiz-it.