Aksion në Karaorman, autoritetet zbulojnë prerje ilegale të druve me dëme milionëshe

Një aksion i madh policor në malin Karaorman ka zbuluar një grup të organizuar që priste ilegalisht dru dhe kishte shkaktuar dëme të mëdha materiale.

Në aksionin e koordinuar morën pjesë policia e Strugës, policia pyjore dhe shërbimet e “Jabllanicës”, ku u sekuestrua masë drusore me vlerë mbi 500 mijë denarë.

Sipas informacioneve të para, prerja ilegale nuk ka dëmtuar vetëm pyje shtetërore, por edhe parcela private pyjore. Autoritetet vlerësojnë se dëmi i përgjithshëm mund të kalojë një milion denarë.

Institucionet njoftuan se hetimet vazhdojnë dhe në ditët në vijim do të kryhen kontrolle shtesë për zbardhjen e plotë të rastit dhe zbulimin e të gjithë personave të përfshirë.

Drutë e sekuestruara do të konfiskohen, ndërsa ndaj të dyshuarve do të ngrihen kallëzime përkatëse penale. Nga institucionet u theksua se nuk do të ketë të paprekshëm dhe se secili që ka marrë pjesë në prerjen ilegale do të përgjigjet para ligjit. përcjell Zhurnal.mk .