Ujku sulmon një grua në mes të Hamburgut, e kafshon në fytyrë

Një ujk kafshoi një grua në fytyrë në qendër të Hamburgut të hënën në mbrëmje herët dhe e plagosi rëndë. Sipas informacioneve të BILD, kafsha e sulmoi gruan rreth orës 19:00 në zonën e filialit IKEA në rrugën ‘Große Bergstraße’ në Hamburg-Altona.

E plagosura u dërgua në spital.

Policët e forcave të ndërhyrjes e gjetën grabitqarin vonë në mbrëmje në Jungfernstieg. Sipas BILD, kafsha u arratis nga policët dhe u hodh në lumin Alster. Policët e nxorën nga uji me një litar dhe e siguruan në një kafaz. Një gjuetar mori në dorëzim ujkun dhe e largoi nga qendra e qytetit.

Eksperti konfirmon: Është një ujk

Kapja pranë Binnenalster i dha fund një aventure dyditore. Për herë të parë, grabitqari ishte parë dy ditë më parë në zonën e lumit Elbe në Blankenese. Fillimisht autoritetet nuk ishin të sigurta nëse bëhej fjalë vërtet për një ujk, por dyshimi u forcua shpejt.

Eksperti i ujqve Norman Stier nga Universiteti Teknik i Dresdenit analizoi një video dhe një foto të dërguar nga qytetarët dhe konfirmoi pa dyshim: bëhet fjalë për një ujk.

Kafsha mendohet të jetë ende e re. Sipas informacioneve të BILD, mund të jetë përzënë nga tufa e saj dhe tani është në kërkim të një familjeje të re. Në këto raste, ujqit shpesh përshkojnë distanca të mëdha-kështu përhapen në Gjermani.

Gjatë ditëve të fundit, ujku është parë në zona të ndryshme të qytetit. Ndër të tjera, pranë shkollës fillore Gorch-Fock në Blankenese. Një banor e pa kafshën në një kopsht në rrugën Friedensweg. Ai u gjend ballë për ballë me ujkun, i cili më pas u largua.

Edhe të hënën në mbrëmje pati shumë raportime. Kafsha u pa, për shembull, në St. Pauli ose pranë panaireve. Një numër i madh policësh arritën më në fund ta neutralizonin situatën. Në takimet e mëparshme me njerëzit, ujku ishte treguar i trembur dhe ishte larguar.

Këtë herë, megjithatë, ndodhi një sulm.