Fëmijët palestinezë pa shkollë prej dy javësh në Bregun Perëndimor

Në Bregun Perëndimor të pushtuar, fëmijët palestinezë nuk kanë mundur të shkojnë në shkollë prej dy javësh për shkak të telave me gjemba dhe telave prerës të vendosur nga kolonët izraelitë. Ndërsa raportohet për rritje të sulmeve nga kolonët në zonë, nxënësit organizojnë çdo ditë protesta duke kërkuar hapjen e rrugës.

Ndërkohë që tensionet po rriten në Bregun Perëndimor të pushtuar, bëhet e ditur se fëmijët palestinezë nuk kanë mundur të shkojnë në shkollë për dy javë për shkak të bllokimeve nga kolonët izraelitë pranë fshatit Umm al-Khair.

Sipas raportimit të CNN International, familjet palestineze theksojnë se kolonët izraelitë kanë mbyllur rrugët që përdoren nga fëmijët me tela me gjemba dhe tela prerës.

Sipas lajmit, nxënësit, mes tyre edhe fëmijë pesëvjeçarë, organizojnë çdo ditë protesta për rihapjen e rrugës.

HUDA 11-VJEÇARE RRËFEN MES LOTËSH

Një nga fëmijët që nuk mund të shkojë në shkollë, 11-vjeçarja Huda, i tregoi përjetimet e saj mes lotësh:

“Nuk duan që unë të mësoj si fëmijët e tjerë në botë. Nuk duan që unë të shkollohem, sepse kur të rritem dua të bëhem avokate dhe të mbroj tokat palestineze.”

SULMET NDAJ FSHATRAVE VAZHDOJNË

Raportohet se në Bregun Perëndimor nuk janë bllokuar vetëm rrugët për në shkollë, por vazhdojnë edhe sulmet ndaj fshatrave ku jetojnë palestinezët.

Objektivi i sulmit të fundit ishte fshati Jalud, në jug të Nablusit.

Pronari i një prej shtëpive të sulmuara, Mahmud al-Tubasi, i përshkroi ngjarjet kështu:

“Më shumë se 100 kolonë na sulmuan. Rrethuan shtëpitë nga të gjitha anët, nuk mundëm t’i ndalonim. Ishim vetëm 10-12 veta. Hapën një vrimë në mur dhe hynë brenda. Kishin me vete lëndë djegëse dhe e dogjën makinën, shkatërruan dhe dogjën gjithçka.”