Arsovski: Mesazhi nga Brukseli është i qartë, pa ndryshime kushtetuese nuk ka përparim drejt BE-së

Analisti politik Petar Arsovski vlerëson se pas vizitës së Presidentit të Këshillit Evropian, Antonio Costa, është bërë e qartë se rruga drejt integrimit evropian të Maqedonisë së Veriut kalon përmes zbatimit të obligimeve të dakorduara, përfshirë ndryshimet kushtetuese.

Sipas tij, për vite me radhë në skenën politike është diskutuar për mundësinë e ndryshimit të kushteve, gjetjes së një zgjidhjeje alternative apo një rruge tjetër për avancimin e procesit eurointegrues.

Arsovski thekson se deklaratat e Costas nuk lanë hapësirë për interpretime të tilla, pasi mesazhi ishte i qartë se marrëveshjet e arritura duhet të zbatohen dhe se nuk ekziston një rrugë anësore për të anashkaluar detyrimet e marra.

“Nuk kemi më luksin të jetojmë me pritjen se kushtet do të ndryshojnë ose se do të gjendet ndonjë zgjidhje alternative. Ajo që është dakorduar duhet të realizohet”, është shprehur ai në një intervistë për TV24.

Sipas Arsovskit, Bashkimi Evropian aktualisht nuk tregon gatishmëri politike për të ndryshuar kornizën ekzistuese të kushteve për vendin, ndaj përgjegjësia për hapat e ardhshëm mbetet te aktorët politikë vendorë.

Ai theksoi se forcat politike në vend duhet të vendosin për drejtimin që do të ndjekë Maqedonia e Veriut në procesin e integrimit evropian dhe për mënyrën se si do t’i përgjigjen sfidave që lidhen me këtë proces.