E konsideruar si një nga aktoret dhe moderatoret më të komentuara të viteve 2000 në ekranet shqiptare, Eriselda Shllaku ka folur së fundmi për karrierën e saj, sfidat dhe largimin e papritur nga televizioni.
Aktorja, e njohur për rolet e guximshme që shpesh kanë thyer tabu në ekran, ka theksuar se gjithmonë e ka trajtuar profesionin me seriozitet, pavarësisht zhurmës që kanë krijuar personazhet e saj.
“Kam thyer shumë tabu në ekran dhe jam komentuar shumë, por gjithmonë e kam parë profesionin me seriozitet,” – u shpreh ajo.
Shllaku kujton me nostalgji fillimet e saj në art, duke nisur si modele dhe moderatore, për të vazhduar më pas studimet në Akademinë e Arteve, ku, siç thotë ajo, e kuptoi se aktrimi ishte pasioni i vërtetë.
Ajo tregon se roli i parë në moshën 20-vjeçare ishte një pikë kthese në karrierën e saj, duke punuar përkrah emrave të njohur të skenës shqiptare të asaj kohe.
“Kam qenë në televizion në kohën më të mirë, kur aktorët punonin për artin dhe jo vetëm për famën,” – tha ajo.
Pas një periudhe larg ekranit, Eriselda u rikthye në spektaklin “Al Pazar”, një ftesë që e konsideron privilegj nga Agron Llakaj, por më vonë u përball me largim të papritur.
Sipas saj, arsyeja e dhënë ishte mungesa e fondeve, pavarësisht kontributit të saj në projekt.
Sot, ajo është aktive si spikere radioje dhe ka përfunduar gjithashtu një master në biznes, duke u angazhuar edhe në një drejtim tjetër profesional, pa u shkëputur nga arti.
“Të gjithë më thonë se kam një zë radiofonik,” – shprehet ajo me humor, ndërsa shton se mirënjohja për publikun mbetet pjesa më e rëndësishme e rrugëtimit të saj.
